Artistët kundërshtojnë propozimet e qeverisë Rama në lidhje me prishjen e Teatrit. Një nga zërat më kritik të projektit të ri të ndërtimit të Teatrit Kombëtar me katër kulla nga pas ishte aktori Bujar Asqeriu i cili prezantoi një projekt për godinën e re të teatrit. Ndërkohë aktori i njohur Robert Ndrenika është shprehur kundër idesë dhe vendimit të kryeministrit Edi Rama dhe kryebashkiakut Erjon Veliaj që Teatri Kombëtar të bëhet me partneritet publik-privat.
“Mua nuk ma heq njeri nga mendja, se edhe Maqedonia u bën teatër shqiptarëve. Pra nuk jam fare dakord për formulën PPP. Më paraqiti zoti Kapexhiu një variant, më pëlqeu. Ka disa variante. Le të bëjnë ato 6-7 kulla që duan të bëjnë. Ne le të na japin sheshin përpara të vëllezërit Frashëri. Unë jam kundër variantit PPP sepse në të gjitha këndvështrimet ky variant është për të përfituar privati, dhe jo teatri”,- tha Ndrenika, duke dalë kundër propozimit të qeverisë Rama.
Lidhur me prishjen e teatrit reagoi dhe Bujar Kapexhiu icili tha se në të gjithë botën, godinat e vjetra ruhen, nuk prishen, ndërsa Arben Derhemi deklaroi se një projekt i realizuar nga regjisori dhe karikaturisti Bujar Kapexhiu është më ambicioz dhe i pranueshëm nga artistët. “U prezantua projekti nga danezi, ne sjellim projektin e shqiptarit (Kapexhiut)”,- tha Derhemi.
Nuk është hera e parë që artistët kundërshtojnë zërat për një prishje të godinës, por zëri i tyre tashmë duket krejtësisht pa ndikim, pasi vendimi është marrë. Kryeministri dhe kryebashkiaku kanë vendosur që në truallin e Teatrit Kombëtar, në një nga zonat më të lakmuara të Tiranës të ngrihen katër kulla dhe në “këmbim” për tokën e zënë, artistëve do u ndërtohet një teatër i ri…
