Kreu demokrat Lulzim Basha deklaroi se njeh problematikën e krijuar nga listat e fundit të kandidatëve për deputet, duke premtuar se krijimi i një aleance vlerash do të përfshijë edhe njohjen e kontributeve të gjithësecilit.
“Njohim problematikën e krijuar nga listat e fundit dhe kjo situatë do të tejkalohet jo vetëm përmes garancive dhe hapësira për secilin kontribuues në PD, por edhe përmes disa masash që janë statutore dhe të vendosjes së besimit.
Paralelisht me protestat kemi ecur me analizat. PD është një kantier i madh. Opozita nuk është njësit gueril. Edhe rruga për në ferr është e shtruar me qëllime të mira, por asnjëherë qëllimet e mira nuk kanë mjaftuar, për të zgjidhur problemet që po kalon Shqipëria.
Nuk kanë rëndësi vetëm qëllimet, por edhe rruga si do e arrish ato”, tha Basha.
Në vijim ai shtoi se ky është ndryshimi mes tij dhe Edi Ramës. “Shqipëtarët duhet të zgjedhin nëse duan të shkojnë në Hollandë si refugjatë, ashtu sikundër po ikin tani, apo që vendi të shkojë drejt dhe të bëhet si Hollanda”, tha Basha.
