Deputeti demokrat Ervin Salianji, ka reaguar pas daljes së fletës me emrat e deputetëve që votuan pro zgjedhjes së Prokurores së përkohëshme të Përgjithshme. Në listë gjendet edhe vetë emri i deputetit, i cili në një reagim në Facebook, kërkon që të ndiqen penalisht ata që vodhën dhe tjetërsuan votën e deputetëve.
“Ndjekje penale për vjedhjen dhe tjetërsimin e votës së deputetëve!
Deputetë të maxhorancës vjedhin votën në sallën e parlamentit; në prani të kamerave, të fotografëve dhe të çdo shqiptari që ndiqte këtë seancë.
Mendoni çfarë kanë bërë me votën e qytetarëve. Mendoni çfarë kanë bërë dhe bëjnë me tenderat dhe aferat korruptive që janë në dokumenta që nuk i sheh dot publiku.
De-legjitimimi i Parlamentit të Shqipërisë u vulos edhe me këtë akt mbyllës të pa ndodhur kurrë më parë.
Jo vetëm politika po mbarë opinioni publik, shoqeria civile dhe çdo zë i rëndësishëm duhet t’i japë vëmëndjen e duhur këtij akti që shemb plotësisht shtetin së drejtës”, shkruan Salianji në rrjetin social.
