Linjat urbane në kryeqytet, janë kthyer në burim sherri. Njerëz që nxitojnë për në punë dhe të tjerë që duan të dërgojnë në orar fëmijët në shkollë. Por në shumicën e rasteve, drejtuesit e automjeteve të linjave urbane, nuk kanë dëshirë të qëndrojnë e të marrin fëmijët që nxitojnë për në shkollë. Kjo shpesh, sjell irritimin e prindërve.
Përplasje të tilla ndodhin shpesh. Mëngjesin e sotëm një prind që ishte duke dërguar vajzën në shkollë, është konfliktuar me një shofer. E gjithë skena ka ndodhur në prani të vajzës së vogël.
E vogla, siç raportojnë mesazhdërguesit pranë JOQ.al, shkon në klasë të parë dhe çdo ditë i ati nxiton ta hipë në autobus, për ta dërguar në destinacion. Mëngjesin e sotshëm, shoferi i linjës Stacioni i Trenit-QendërTeg, gjithmonë sipas raportimeve të qytetarëve, nuk ka pranuar t’i hapë derën dhe të lejojë të voglën të hipë në autobus.
Kjo e ka nxehur babanë e saj, i cili ka ngulmuar, por me sa duket, shoferi i automjetit të kësaj linje, ka qenë i zgjuar keq, ose e ka pickuar miza dhe është çuar nga vendi i tij, duke i lënë shumë qytetarë të tjerë të presin, e i është turrur burrit, duke u zënë me të në sy të fëmijës së vogël. E gjithë skena e grushteve e shqelmave mes dy burrave është parë nga vogëlushja që ndjek klasën e parë. Më konkretisht, bëhet fjalë për urbanin me targë AA 076 SM, që udhëton në këtë linjë, thuajse çdo ditë. Nuk besojmë se ka vend për të bërë moral dhe se fjalët janë të tepërta, por në fund të fundit, nëse ju do të ishit në vend të këtij prindi, apo të atyre udhëtarëve, ç’mendim do të kishit për këtë shofer? P.S. mos harroni se edhe ai mund të jetë prind, mund të ketë kaluar një natë të keqe apo të ketë probleme të tjera. /JOQ.AL/
