Tomas Strakosha po zhvillon deri më tani një sezon thuajse të përsosur tek Lazio.
Paraqitjet e portierit të kombëtares shqiptare janë vlerësuar edhe nga e përditshmja e njohur italiane “Gazzetta dello Sport”. Në një studim të kryer nga kjo gazetë, 22 vjeçari shqiptar rezulton i dyti mes portierëve më të mirë të Serisë A.
Thomas Strakosha po zhvillon deri më tani sezonin më të mirë të karrierës së tij. Edicionin e shkuar ai debutoi me Lazion në Serinë A e më pas falë punës së tij dhe dëmtimeve të Marchetit u aktivizua në një sërë takimesh, ndërkohë që në këtë sezon portieri shqiptar është konfirmuar jo vetëm si portieri titullar i “bardhekaltërve” por edhe si një ndër talentët më premtues të kampionatit italian.
Forma optimale e 22 vjeçarit nuk ka kaluar pa vëmëndjen e mediave në gadishullin apenin dhe e përditshmja prestigjoze “Gazzetta dello sport” pas një studimi ku ka analizuar pritjet e të gjithë portierëve të Serisë A ka dalë në konkluzionin se portieri i kombëtares sonë ka përqindjen e dytë më të lartë ndër të gjithë gardianët e kampionatit italian, me 78.9%. Vendi i parë mbahet nga braziliani i Romës, Allison Becker me 86.5%.
Një studim që nxjerr në pah sigurinë e shfaqur nga Strakosha në këtë edicion, i saktë dhe vendimtar në shumë momente për Lazion, teksa paraqitjet e tij e kanë ndihmuar jo pak skuadrën kryeqytetase në këtë fillim sezoni, ku “bardhekaltrit” kanë ofruar një performance vërtetë pozitive.
Lazio mban vendin e dytë në renditje me pikë të barabarta me Juventusin dhe me 3 pikë më pak se kryesuesit e Napolit. Ndërkaq që në listën e përpiluar nga “Gazzetta dello Sport”, Etrit Berisha ndodhet i pozicionuar përpara talentit 18 vjeçar të Milanit, Gianluigi Donnarumma me 60% të gjuajtjeve të pritura.
