Analisti Andi Bushati, në një shkrim të tijin, botuar në “Lapsi.al” shkruan se kryeministri Rama po zbaton porositë e Mao Ce Dunit, në një nga librat e tij për masat popullore.
Sipas Bushatit, Rama e di shumë mirë se ku u dhemb njerëzve, dhe po përpiqet të shuajë urinë e tyre për hakmarrje ndaj drejtorëve vendorë që i kanë sorollatur.
“Po të shikosh në rrjetet sociale duket sikur kjo manovër ia ka arritur qëllimit. Komentuesit e shohin me gëzim rënien e hierarkëve lokalë, që ishin fryrë me pushtetin që u kishte deleguar PS-ja.
Ata ngushëllohen me hakmarrjen e tyre të vogël, ndaj zyrtarëve kokëbosh që i kanë sorrollatur, apo ndaj pazarxhinjve që i kanë zhvatur. Ata duken të kënaqur të lëpinë gishtat me sorrat, në pamundësi që t’i presin kryet pulës së madhe.
Por, përtej këtij shoë propagandistik, lëvizja e re e Ramës nuk ka asgjë të re.
Ajo duket e kopjuar fjalë për fjalë nga mësimet e një timonieri tjetër, njërit prej dy luanëve që ka pasur bota, Mao Ce Dunit.
Po t’i kthehesh sot ndonjerës prej atyre pak kopjeve të mbetura të librit të kuq, të shpërndarë me shumicë në Shqipëri, kur Edi Rama ishte ende fëmijë, nuk e ke të vështirë të kuptosh se, për herë të dytë, historia përsëritet në mënyrë qesharake.
Po të shfletosh në të dhe të gërmosh mes 22 citimeve të kapitullit 11 që mban titulln: “Vija e masave” surpriza përfundon.
“Masat janë heronjtë e vërtetë”, “Të nisesh nga masat për t’u rikthyer tek ato”, janë fjalët e timonierit origjinal, që shpjegon se partia duhet të zbulojë faktet dhe mendësitë që qarkullojnë mes masave, t’i përmbledhë, t’i gjeneralizojë për t’i kthyer më pas në shërbim të tyre”, shkruan ai.
“Edi Rama do të fitojë dy gjëra. Së pari do të riblejë kohë duke e bërë shumëkënd të besojë se fajin e paskëshin pasur drejtorët e vegjël. Dhe së dyti do të mbahet mend në histori, se ktheu dacibaot e reja, ato të librit të dytë të kuq të shkruar prej tij”, përfundon ai.
