“Një sasi të tillë me marijuanë e kam parë shumë rrallë” ka thënë shefi i Zyrës Federale Doganore për Kriminalitet, Norbert Drude pas kapjes së mbi 550 kilogramëve në një kamion që udhëtonte në Mynih. Mediat gjermane raportojnë se droga u nis nga Shqipëria, megjithëse itinerari i ngarkesës nuk është zbardhur ende.
Kamioni i ngarkuar me drogë drejtohej nga një serb që është arrestuar nga policia. Kjo është sasia e dytë më e madhe e drogës, e kapur ndonjëherë në Gjermani në 10 vitet e fundit. Të habitur nga ngarkesa e madhe, policët gjermanë kanë bërë foto pranë pakove me kanabis, të denja për rrjetet sociale, siç duket më lart.
Kamioni u kap në Mynih, por mësohet se destinacioni final ishte Hamburgu. Një ngarkesë si kjo konfirmon edhe njëherë reputacionin e Shqipërisë në BE si një prej vendeve furnizuese të marijuanës, e përsëritur në të gjitha raportet e agjensive të huaja. Viti 2016 pati një superprodhim kanabisi, që u shtri në të gjithë vendin. Për këtë vit, qeveria shqiptare ka ndryshuar qëndrim dhe po përpiqet të ndalë mbjelljen e hashashit. Megjithatë magazinat kanë ende rezerva të mjaftueshme për të furnizuar ende për shumë kohë trafikantët dhe përdoruesit./Lapsi.al
