Analisti Fatos Lubonja, i ftuar në emisionin “Të Paekspozuarit”, deklaroi se Partia Demokratike në drejtimin e Berishës dhe Bashës ngjan njësoj me Partinë Komuniste në drejtimin e Enver Hoxhës me Ramiz Alinë.
Fatos Lubonja – Edhe unë pak a shumë jam në ujërat e Bushatit dhe ideja është këtu. Tani më duket mua, sikur meqenëse ju kërkonit të krijonit diçka të re, lëvizje apo të merrnit parti. Shoh një idealizëm apo mitizmi të së kaluarës të PD-së. Dmth.
Astrit Patozi – Nga unë jo besoj! Apo edhe nga unë?
Fatos Lubonja – Edhe nga ju! Se kur thoni rritje autoritarizmi më keq s’ka qenë ndonjëherë, e gjitha këto, unë mendoj sepse kishim dhe Selamin këtu, dhe ai erdhi po me këtë tezë, që Partia Demokratike ka qenë, ka pasur zgjedhje, ka pasur demokraci, por ka humbur demokracia. Tani mendimi im është, që hiq ato muajt e parë ndoshta, që kishte ca personalitete, që u përjashtuan nga partia, Partia Demokratike mori tiparet e partisë mëmë nga kishte dalë dhe Sali Berisha që ishte Partia e Punës, sigurisht jo më me atë tragjizmin e asaj kohe, por me parti person. Parti e një personi. Dhe mendoj që diferenca midis Sali Berishës dhe Lulzim Bashës është kjo, që siç ndodh në partitë që janë parti person është vështirë të lindë një trashëgimtar i forte, sepse ai i ka marrë të gjitha, ai do të sundojë jo vetëm kur është jashtë, por edhe pas vdekjes do ta drejtoje ai. Si Enver Hoxha kur vuri Ramiz Alinë donte ta drejtonte partinë dhe pas vdekjes ai. Dhe këtë nuk e keni kapërcyer ju. Kështu që Lulzim Basha më së shumti, sillet tani me idenë, se duhet të bëhem unë partia person. Dmth të zëvendësojë unë Sali Berishën. Nuk po e zëvendëson partinë. Në kuptimin që, nuk po krijon demokratizim të partisë, një parti tjetër po thotë të bëhem unë Sali Berisha dhe ka trashur dhe zërin dhe ka bërë shumë gjeste në këtë formë. Unë mendoj që ajo sëmundja, që është ju nuk e keni prekur në plagë, nuk po flas tashi për personin Berisha, por për mënyrën e të menduarit e ndërtimit të partisë. Ju nuk e godisni ore, ne nuk e duam më atë parti person, që e ndërtoj Sali Berisha.
Ky është mendimi im i parë që nuk e shoh nga ju, që të rrifet, sepse ju keni prap frikën e atij udhëheqësit të madh historik siç e quani ju, që mundet të dëmtojë. E dyta që kam unë si çështje që mund ta diskutojmë është kjo, që mirë partia por qasja Partia – Shqipëria dhe raporti i kësaj partisë me Shqipërinë tek juve më duket i paqartë.
