Kryetari i komisionit qendror të votimit në Partinë Demokratike, Jemin Gjana u shpreh sot se listat e anëtarësisë nuk mund të bëhen publike në faqen elektronike për shkak se shkelet ligji për mbrojtjen e të dhënave personale. Sipas tij edhe rivali i Bashës, Eduard Selami mund të shohë listat në të gjitha degët e PD-së.
Por a është e përgatitur selia blu nëse Selami tërhiqet nga gara? Gjatë konferencës për mediat, Jemin Gjana u shpreh se kjo është njësoj sikur të merresh me balenën blu dhe ai nuk e ka informacionin nëse Selami do të tërhiqet.
Pse nuk bëhet publike lista?
Është publike në të gjitha degët e PD-së, për zotin Selami dhe për këdo tjetër. Ato janë të dhëna për përdorim të brendshëm, janë të dhëna personale të cilat në bazë të ligjeve që ka ky vend nuk mund të bëhen publike. Asnjë parti në Europë nuk ka që ta ketë listën e anëtarësisë në sitin e partisë.
Ku do bëhet numërimi i votave?
Numërimi do të kryhet i përqëndruar. Në përfundim të procesit të votimit do të ngrihen 7 grupe numërim që do funksionojnë në PD dhe me të mbërritur kutia e fundit do nisë menjëherë procesi i numërimit. Do të jetë transparent dhe publik.
Nëse tërhiqet Selami nga gara si do procedohet?
Nuk jam këtu për tu dhënë përgjigje atyre që merren me Balenën Blu, qofshi edhe ju njëri prej tyre. Unë skam ndonjë informacion që do tërhiqet Selami.
