Dy persona janë vënë në pranga dhe një i tretë është shpallur në kërkim pas finalizimit të një operacioni nga blutë e kryeqytetit, ku u sekuestruan 60 kg kanabis si dhe 3 armë gjahu të markave të ndryshme.
Siçiljan Çakraj, 20 vjeç dhe Bujar Rryta, 54 vjeç u arrestuan në përfundim të operacionit të koduar “ndjekja”, nga seksioni për Narkotikët në Drejtorinë e Policisë Tiranë, gjithashtu u shpall në kërkim edhe një 28-vjeçar me inicialet B.Rr.
Burime nga policia bëjnë me dije se arrestimi i tyre është bërë në bazë të informacioneve të marra në rrugë operative, ku rezultonte se Siçiljan Çakraj dhe B. Rr., kryenin aktivitetin e kundraligjshëm të shpërndarjes së lëndëve narkotike në sasira të mëdha në zona të ndryshme të Tiranës.
Bëhet e ditur se mbi bazën e informacioneve të mara është organizuar shërbim me qëllim kapjen në flagrancë të dyshuarve, sot ata janë konstatuar bashkë në rrugën “Teodor Keko”, duke lëvizur me automjetin fuoristradë të markës KIA me targa AA 166 PP, ku janë konstatuar duke lëvizur në drejtim të Kamzës, e më pas në fshatin Larushk në afërsi të banesës së shtetasit Bujar Rryta, ku dyshohej se strehonin lëndën narkotike, duke u kthyer përsëri në Tiranë.
Në vendin e quajtur “Pallati me Shigjeta”, është bërë ndalimi dhe kontrolli i shtetasit Siçiljan Çakrajt, ku gjatë kontrollit në xhepin e pantallonave ju gjet një sasi lënde bimore e dyshuar narkotike, e cila rezultoi me peshë 4.6 gramë.
Por gjatë kontrollit në ambientet e banesës së Bujar Rrytas, në fshatin Larushk, u gjetën tre fuçi plastike të mbushura me lëndë bimore si dhe një qese e zezë e mbushur me lëndë bimore të dyshuar narkotike kanabis, ku pas peshimit rezultoi se sasia e lëndës narkotike në total ishte 60 kilogramë, si dhe tre armë gjahu.
Gjatë ndërhyrjes shtetasi B. Rr,, ka arritur ti shmanget kapjes së Policisë, por është shpallur në kërkim dhe vijon puna për kapjen e tij.
