Kreu i Forumit Rinor të Partisë Demokratike, Belind Këlliçi është shprehur se ka qenë në dijeni të vendimit të Lulzim Bashës për ta mos e futur në listat e kandidatëve për deputetë, përpara se listat të publikoheshin.
“Kam patur një bisedë shumë të gjatë me Lulzim Bashën ditën që do të dilte lista. Është një bisedë konfidenciale për të cilën nuk dua të flas. Ishte vendimi i Bashës që të mos isha në listë . E dija përpara se të publikoheshin listat që nuk do të isha”, ka thënë Këlliçi.
Më pas ai ka treguar se ka pasur oferta nga parti të tjera për të dhënë kontributin e tij politik, por pa treguar se nga kush.
Pas insistimit të gazetarit, Këlliçi përjashtoi ofertat nga PS-ja, duke lënë të nënkuptohet se ishte LSI-ja. Për këtë të fundit ai u shpreh se do të bëjë një opozitë agresive në Kuvend.
Sa i përket garës në PD, ai tha se sa më shumë kandidatura të kishte në këto zgjedhje aq më mirë do të ishte. I pyetur për atë që është komentuar ditët e fundit në rrjetet sociale se “PD u themelua nga studentët e dhjetorit dhe u shkatërrua nga studentët e Cilit”, Këllici u shpreh se “Ndikimi i Neim Çilit në strukturat e PD-së është negativ”.
