Genc Brahysa ishte pjese e një aksioni të bujshëm të para pak ditëve të policisë, e cila njoftoi se kishte zbuluar një punishte me aktivitet të paligjshëm për prodhimin e pijeve të dyshimta për konsumatorët.
Ai u la i lirë me masën detyrim paraqitje sipas kërkesës së Prokurorisë që nga ana tjetër thotë se duhet verifikuar edhe pretendimi i policisë nëse ka vepër të prodhimit të kundraligjshëm të mallrave industrial dhe ushqimor. Por ndërsa raportohen si të sekuestruara makineri artizanale për prodhimin e pijeve, koncentrate me afat të skaduar dhe aromatizues e esence, përplasja mes policisë dhe prokurorisë për këtë dosje është e dukshme.
Zyrtarisht policia tha se po hetonte edhe administratoren e punishtes si edhe kishte shpallur në kërkim një kimist, nga policia në Prokurori e më tej në Gjykatë dosja ka përfunduar vetëm me një emër të dyshuari që është Genc Brahysa.
Por megjithëse prokurorët shpallën të ligjshëm arrestimin e Brahysës duke kërkuar masë detyrim paraqitje, ajo çfarë hetuesit shikojnë të paqartë është perse ky shtetas u prangos kur në dokumentacion ekziston si administratore e biznesit Florena Brahysa.
Në dosje agjentet e policisë thonë se u njoftuan përmes komisariatit dixhital për punishten e fshehtë të pijeve energjike dhe freskuese që me tej hidheshin në treg. Por gjatë masës së sigurisë 34-vjeçari Brahysa depozitoi dokumente ku rezulton se ai ishte i punësuar nga bashkëshortja e tij në një biznes të regjistruar që prej vitit 2013.
Aktualisht raportohet se janë të bllokuara 3 mijë shishe me pije freskuese të dyshuara si të falsifikuara. Por do të jetë Instituti i Higjienës që do të kontrollojë produktet e sekuestruara për t’i dhënë përgjigje se cila nga palët ka te drejtë. Pyetjet qe autoritetet i drejtojnë eksperteve janë: A i plotësojnë standardet për konsum këto pije?; Çfarë përbërësish kimike kanë esencat e dyshuara si të kontrabanduara dhe me kryesorja a janë të dëmshme për shëndetin.
