Ambasada Amerikane ka përshëndetur sot largimin e deputeti socialist Armando Prenga për shkak të kaluarës së tij kriminale. Por në mesazhin e saj, Ambasada u bën thirrje qytetarëve që në listat zgjedhore të mos votojnë kandidatë me të shkuara kriminale.
“Personat me dosje penale nuk kanë vend në parlamentin, gjykatat, qeverinë, apo bashkitë e një vendi anëtar të NATO-s, i cili gjithashtu synon t’i bashkohet BE-së. Inkurajojmë qytetarët shqiptarë dhe institucionet shqiptare të jenë vigjilentë për parandalimin e kriminelëve nga kandidimi në zgjedhjet e 18 qershorit. Shqiptarët meritojnë të kenë një sistem politik dhe gjyqësor të pastër, pa ndikimin e krimit të organizuar dhe korrupsionit”, lexohet në deklaratën e Ambasadës Amerikane.
Kjo thirrje përtej propogandës duket se nuk ka asnjë sens pasi listat e deputetëve janë të mbyllura dhe përpilohen nga kryetarët e partive, Për rrjedhojë përgjegjësinë për inkriminimin e situatës politike e kanë vetëm kryetarët e partive dhe jo qytetarët të cilët kanë të drejtë të votojnë partitë por jo kandidatët.
