Mandati i Armando Prengës shkaktoi debate të forta në mbledhjen e radhës së KQZ-së.
Madje kjo çështje bëri që të lindte një përplasje institucionale midis Komisionit Qendror të Zgjedhjeve dhe Prokurorisë. Kjo e fundit këmbëngulte se Prenga nuk kishte deklaruar dënimin që kishte marrë nga gjykata, një fakt i mjaftueshëm ky për t’i hequr mandatin.
KQZ konsideroi të pamjaftueshme materialet e prokurorisë për Prengën. Prokuroria e Përgjithshme, më 25 shkurt, në formë ultimative rikërkoi heqjen e mandatit të deputetit Prenga, duke i kujtuar KQZ-së se ate ditë i përfundonte afati 10-ditor.
KQZ njoftoi vazhdimin e mbledhjes për pikën e shtyrë të rendit të ditës.
Por Partia Demokratike u largua nga kjo mbledhje, pasi përfaqësuesit e partive politike nuk u lejuan të flisnin për dekriminalizimin dhe konkretisht për rastin e Armando Prengës.
Sakaq mbledhja e KQZ ka degraduar në një përplasje të ashpër mes anëtarëve të opozitës dhe kreut të KQZ, Denar Biba.
Bida ka zhvilluar një debat të ashpër me Klement Zgurin dhe Vera Shtjefnin.
Ja debati:
Zguri: Je avokat i anëtarëve?
Më duket sikur anëtarët e KQZ janë vetëm figurantë. Këtu është një biznes privat. Kërkesa nuk iu vjen juve, i vjen KQZ për vendimmarrje.
Edhe në vit të parë të Juridikut të jesh e di këtë.
Mandati vjen si rezultat i një procesi zgjedhor.
Biba: Ma thuaj pak bazën ligjore.
Zguri: Të kujt mo? Pse ke frikë nga vendimmarrja?
Biba: Jo mo nuk kam. Partitë politike kanë interesat e tyre politike. Qasja politike ka degraduar drejtësinë.
Biba: Nuk e merr fjalën këtu!
Zguri: Atë tavolinë e gënjen mendja se është më e rëndësishme se kjo tavolinë.
Biba: Edhe kjo është tavolinë e shtetit i nderuar.
