Në ditën e 10-të të protestës së opozitës para zyrës së kryeministrit Rama, kryedemokrati Lulzim Basha zhvilloi sot një takim me ish-të përndjekur politikë, nga ku ka premtuar se në qeverisjen e tij do të zgjidhen plotësisht kërkesat e tyre.
Për Bashën ka vetëm dy rrugë ose të tërhiqet populli ose të japë dorëheqjen qeveria. E sipas tij tërheqja e popullit në këto momente do ta zhyste vendin në një krizë.
‘’Këtu nuk jemi për interesat tona, jemi për interesin ekzistencial të çdo shqiptari. Për zgjedhje të lira e të ndershme. Ky bashkim sa vjen e rritet. Sot kemi të përndjekurit politikë po kanë mbërritur dhe emigrantët që u nisën nga Athina para dy ditësh.
Po ashtu janë nisur të tjerë nga Italia, nga Brukseli e nga Londra. Ideali për të cilët të përndjekurit janë nuk është vënë ende në vend. Ne kemi bërë shumë në këtë drejtim në qeverisje dhe në politikë. Po ka akoma shumë për të bërë.
Republika e re që po ndërtojmë së bashku do të jetë Republika e lirë vetëm nëse do të kemi zgjidhur tërësisht ccështjen tuaj. Dy rrugë ka ose tërheqja e popullit ose dorëheqja e qeverisë. E para do ta zhyste vendin në krizë dhe e dyta është e vetmja zgjidhje’’, ka thënë Basha.
