Policia e Korçës në bashkëpunim me Prokurorinë deklaron se ka zbuluar fakte të reja lidhur me ngjarjen e ndodhur më datë 29 gusht 2016, në një lokal në afërsi të fshatit Dishnicë, ku pas një konflikti me sende të forta, gjeti vdekjen një 23-vjeçar nga Korça.
Llazar Dine, 35 vjeç, banues në fshatin Dërsnik të Korçës, u arrestua nga policia ditën e djeshme, për veprën penale “Plagosja e rëndë me dashje, me pasojë vdekje”.
Në vijim të hetimeve dhe dokumentimit me prova ligjore të kësaj ngjarje, Gjykata e Korçës, në 22 shkurt të vitit 2017, ka caktuar ndaj tij masën e sigurisë “Arrest me burg”, për veprën penale “Plagosja e rëndë me dashje, me pasojë vdekje”.
Dine rezulton bashkautor me pronarin e lokalit Olsi Zyberi, i cili u arrestua nga policia menjëherë pasi ka ndodhur ngjarja.
Të dy këta shtetas, janë konfliktuar për motive të dobëta me 23- vjeçarin Marsel Osmani, i cili si pasojë e plagëve të marra, gjeti vdekjen në Spitalin e Traumës në Tiranë.
