Ish-kreu i Gjykatës së Kasacionit, aktualisht Gjykata e Lartë dënon kërcënimet për dhunë të politikës, duke bërë thirrje se vetëm paqja i duhet Shqipërisë.
Brozi nënvizon se populli shqiptar duhet të protestojë, por nuk duhet të marrë përsipër të bashkohet me ata politikanë të opozitës që kërkojnë të djegin dhe njëherë Shqipërinë për të shpëtuar veten nga Reforma në Drejtësi.
Deklarata
Shqiptarët kudo që janë t’i thonë jo thirrjeve të Bashës, Berishës e kujt do qoftë për dhunë, djegie e shkatërrim. Njerëz të ndershëm të Shqipërisë sonë të dashur mos sakrifikoni veten për politikanë! Drejtësia bëhet e ashpër mbi ju qytetarët e thjeshtë ndërsa politikanët janë të Paprekshëm! Kujtoni sa mijëra qytetarë të thjeshtë u vranë në këto 25 vite dhe sa herë u dogj e shkatërrua Shqipëria jonë e dashur sepse ashtu deshën disa politikanë vrastar e djallëzore! Sa prona të vena me aq mund nga njerëzit e thjeshtë u vodhën e shkatërruan! Sa shumë pasuri e gjithë popullit u vodh apo shkatërrua! Sa shanse humbi Shqipëria nga kjo dhunë!
Asnjë gjemb në këmbë nuk u hyri atyre politikanëve që e nxiten dhe organizuan dhunën! As pasuria dhe jeta e shëndeti i tyre dhe i të afërmve të tyre nuk pësoi ndonjë dëm! Përkundrazi, ata janë sot në politikë dhe paguhen nga taksat e shqiptarëve. Shumë prej tyre bëjnë jetë luksi me pasurinë e vënë me korrupsion! Prokuroria dhe Gjyqësori kanë garantuar Paprekshmërinë e këtyre politikanëve! Disa politikanë të opozitës po duan të djegin përsëri Shqipërinë për të shpëtuar veten nga Reforma në Drejtësi. Qytetarët kanë të drejtë të protestojnë paqësisht për problemet e tyre, por jo të shkelin ligjet dhe kryejnë krime edhe kur i urdhëron Luli a kushdo tjetër. Paqja e jo dhuna i duhen Shqipërisë!
