Një ngjarje që ka shokuar prindër dhe mësues është shënuar sot në një shkollë 9-vjeçare në Tiranë.
Mësohet se nxënësit e një klase të shtatë, në shkollën “1 Maji: u gjetën nga mësuesja e Matematikës me pluhur të bardhë në fytyrë.
Fëmijët thanë se kishin thithur limontoz me hundë, në shenjë proteste për sjelljen e mësuesve në klasë.
Por të rriturit i ka shokuar mënyra e protestës që kanë zgjedhur fëmijët, që kishin menduar të imitonin përdorimin e kokainës në klasë.
Raportohet se ankesat e fëmijëve dhe prindërve kanë qenë të përsëritura për organizmin e orës së mësimit. Sipas këtyre ankesave në vend që të shpjegonin materialin e radhës, mësuesit e kalonin orën duke dhënë disa ushtrime për nxënësit.
“Pavarësisht ankesave, drejtuesit e shkollës nuk merrnin masa, ndaj fëmijët kanë gjetur këtë mënyrë për t’u dëgjuar. Tre prej tyre kishin blerë qeset me limontos dhe e kishin shpërndarë për nxënësit e tjerë që nisën ta thithin me hundë. Sapo konstatuan situatën, mësuesit pezulluan mësimin dhe lajmëruan prindërit për një mbledhje gjatë pasdites së sotme. Fatmirësisht asnjë prej fëmijëve nuk ka pasur probleme me shëndetin”, raporton “Lapsi”.
