Pas deklaratave të forta të kryedemokratit, Lulzim Basha se do të përshkallëzohet mosbindja civile kundrejt zyrtarëve që prekin qytetarët, edhe me thyerje thyerje xhamash, shpime gomash dhe tërheqje zvarrë nga zyrat e administratës, janë shtuar masat e sigurisë përreth Kryeministrisë.
Nga fotot duken automjete të policisë dhe FNSH-së janë stacionuar në rrugët përreth Kryeministrisë.
Kurse në rrugë vihen re më shumë forca policie.
“Kushdo që godet qytetarët dhe protestën, do të vijë ora t’i marrim zvarrë në këtë shesh. Doni luftë, luftë do të ketë. Shpojuani gomat e makinës, thyejuani xhamat, atyre që ju ndëshkojnë pa të drejtë. Kush luan me popullin t’i bëjë llogaritë mirë, se ndryshe vala popullore do t’i fshijë nga zyrat. Kjo është një lëvizje popullore pa kthim, nuk është një manifestim partiak. Populli nuk mund të durojë më. Durimit të popullit i ka ardhur fundi, edhe durimit tonë. Boll me akte të paligjshme në kurriz të shqiptarëve, në kurriz të biznesit, por vjen momenti kur nuk do të gjeni vrimë miu për t’u futur, kur zemërata popullore të rritet. Kur ju godasin, mos ktheni faqen tjetër, por goditini me grusht. Për çdo padrejtësi goditini me grusht, koha kur populli trajtohet si dele po merr fund”, tha Basha sot.
