Rama i përgjigjet Blushit dhe opozitës: Vettingu s’krahasohet dot me 3 ligjet e 2010-ës

Kryeministri Edi Rama, teksa mbajti një fjalim të gjatë, iu përgjigj nga foltorja e Kuvendit, akuzave të kreut të LIBRA-s, Ben Blushi, duke thënë se “flet me fakte dhe jo me barcaleta, apo gjëegjëza”.

“Në nje vend që konsumi rritet ka më shumë apo më pak varfëri? Kjo nuk do të thotë që në këtë vend nuk ka varfëri. përkundrazi, ka ende një problem të madh siç është varfëria, por një problem që për herë të parë atakohet drejtpërdrejtë dhe jo duke i ardhur rrotull me lëmosha, shtyje ta shtyjmë. Komisioni Europian është një autoritet që i fut të dridhurat dhe vendeve më të mëdha të BE kur vjen puna te parametrat ekonomikë. Ata që flasin kundër rritjes ekonomike në vend kanë për qëllim të tërheqin për hunde sa më shumë njerëz të dëshpëruar me gënjeshtra pas gënjeshtre, si hiena që jetojnë me kërma. Trendi pozitiv i konsumit vijon për të pestin tremujor. Rritja reale e konsumit për 2016 është 3 për qind dhe deficiti është 2,5 nga 5, 2 për qind që ishte kur e morëm pushtetin. Kemi zgjidhur përfundimisht problemin me rrugën e stabilizuar të financave duke dalë në një kthesë përballë humnerës që na kërcënonte”, tha Rama.

Madje Rama i ka dhënë përgjigje edhe protestuesve, duke thënë se nuk ka asnjë krahasim me “bllokimin e tre ligjeve në 2010 me bllokimin e vetingut”, që sipas tij po bën sot PD-ja.

“Dua të flas me gjuhën e fakteve. Dje qeveria ka kaluar vendimin për rritjen e pensioneve që hyjnë në fuqi. Reforma në energji është shembull për vendet e tjera. Pse çadra lidhet me vettingun. Procedurat nisin javën e ardhshme në këtë parlament dhe protesta mund të vazhdonte normalisht. Asgjë nuk e pengonte, madje do ta ndihmonte sepse në këtë foltore do të ishte duke folur Saliu me orë të tëra. Si ka mundësi që të heqin dorë pikërisht tani sepse nuk duan vettingun. Ata e thonë dhe nuk e mohojnë. E thonë shprehimisht se vettingun do ta bëjnë ata. Nuk ka 2 vettingje, 3 apo 5 vettingje. Kjo është e qartë”, tha Rama.

“Krahasimi me tre ligjet është një krahasim idiot. Shqipëria nuk e merrte statusin e vendit kandidat me ato ligje, siç nuk e mori. Ne i kishim të miratuara ato tre ligje në fund të 2013, kur na u tha ndaluni pak se keni akoma punë për të bërë. Dhe vettingu është kushti i vetëm për hapjen e negociatave. KE ka filluar me Shqipërinë procesin teknik pas hapjes së negociatave për të fituar kohë. Qeveria shqiptare dhe Komisioni Europian kanë filluar punën së bashku për të kaluar kapiturj 23-24 që janë kapitujt kryesore për hapjen e negociatave. Bllokimi i vettingut realisht, dhe jo me fantazi si tre ligjet, pengon integrimin”, shtoi ai.

Rama nënvizoi se ndërkombëtarët e kanë dekalruar qartë: “Pa reformën në drejtësi që fillon me vettingun, dhe pa vettingun, nuk mund të ketë më shumë ekonomi, punësim, investime të huaja, mirëqenie, për arsyen e thjeshtë se këto gjëra armikun më të madh sot në këtë vend kanë drejtësinë, mungesën e drejtësisë”.