Kreu i LSI-së, Ilir Meta, duke drejtuar mbledhjen e kryesisë së kësaj partie, vuri theksin tek zgjedhjet e 18 qershorit.
“Zgjedhjet e 18 qershorit janë kyçe për hapjen e negociatave të anëtarësimit në BE, por edhe për të nisur reformën në drejtësi, në një terren të sigurtë dhe tërësisht legjitim, pavarësisht rezultateve të forcave politike, përfshirë LSI-në”, ka thënë Meta.
Meta edhe pse shprehi shqetësim, tha se vlerëson protestën paqësore të opozitës. “Nuk mund të mos shpreh shqetësimin për protestën e opozitës, të cilën duhet ta vlerësoj për natyrën paqësore”, deklaroi Meta.
Teksa ka shtuar se referimi tek opinioni i Komisionit të Venecias dhe konsensusi mes palëve për reformën në drejtësi duhet të shërbejnë si bazë për reformën.
“Kjo reformë, që do të kërkojë kohën e saj, për ne ka 3 fjalë kyçe: Kushtetuta, ligji dhe transparenca”, ka shtuar Meta.
