Deputeti socialist, Ervin Bushati, vlerësoi të drejtën e opozitës për të protestuar, por thotë se sheh një paradoks në kauzën e demokratëve.
I ftuar në Ora News, Bushati tha demokratët po bllokojnë drejtësinë, i vetmi garant për zgjedhje të lira dhe të ndershme. Bushati listoi edhe tre arsyet, sipas tij, se pse PD është ngujuar në tendë.
Ervin Bushati: Protesta e PD shumë mirë, çadra e Bashës shumë gabim. Të protestosh është një nga normat më demokratike në një sistem të lirë siç është Shqipëria, në Shqipëri demokracia ka lindur me protesta. Respektohen dhe janë të mirëpritura nga çdo lloj grupimi. Bojkoti i parlamentit dhe dialogut mes palëve sidomos në një moment kaq në udhëkryq sa është reforma në drejtësi që ka të bëjë me proceset e vettingut që duhet të nisin sa më shpejt, është shumë e dëmshme për demokracinë shqiptare. Brenda tendës së tij Basha ka mbyllur një paradoks shumë të madh në thelb, kërkon zgjedhje të lira dhe të ndershme. Zgjedhjet e lira dhe të ndershme garantohen vetëm me një shtet ligjor, rend ligjor në një vend ku funksionon drejtësia.
Nëse Basha ka pasur dyshime për vullnetin politik të një force për të menaxhuar zgjedhjet e lira dhe të ndershme, e vetmja garanci që do të kishte është drejtësia. Në gjithë këto vite të një demokracie të cënuar nuk kemi pasur asnjë komisioner të dënuar, asnjë forcë politike apo politikan të dënuar. Forcat politike nuk ja kanë frikën drejtësisë kur vjen puna për çështjen e zgjedhjeve. Ai bllokon drejtësinë, të vetmin garant për zgjedhjet e lira. Ka dy arsye apo tre arsye reale pse Basha është në tendën e tij që ka një fraksion shumë më të vogël se ajo që ishte në protestë.
Kasta e Bashës përpiqet të shpëtojë nga vettingu dhe drejtësia kanë vendosur ta bllokojnë procesin. Po kështu Bashës i duhet një alibi që bashkë me humbjen e zgjedhjeve të mos humbasë dhe PD si udhëheqës i saj. Sa më shumë vazhdon këtë rrugë pa krye aq më të vështirë e bën daljen pa një strategji apo arsye pse do dalë nga tenda e tij.
