Teksa zgjedhjet presidenciale në Francë po afrojnë, 3 janë kandidatët në garë: Francois Fillon, ish-Kryeministër në kohën Presidentit Sarkozy, tjetri është një emër i pavarur, Emanuel Macron dhe euroskeptikja, Marine Le Pen. Por duket se asnjëra prej këtyre kandidaturave nuk ua mbush mendjen francezëve.
Këta të fundit për të gjetur kandidatin ideal dhe të preferuar prej tyre, po shohin përtej kufijve të tyre, të paktën një grup aktivistësh, që kanë hapur një faqe në internet dhe nën sloganin “Oui on peut”, siç thuhet në frëngjisht slogani i famshëm i Barack Obamas, “Yes we can”.
Aktivistët francezë kërkojnë të grumbullojnë 1 milionë firma në kërkesën që i adresohet ish-Presidentit të Shteteve të Bashkuara që të bëhet edhe njëherë tjetër President, por këtë radhë jo i Shtëpisë së Bardhë, por i Elizesë.
BBC-ja raporton se organizatorët e peticionit janë me këmbë në tokë dhe të vetëdijshëm për mundësitë që kjo të ndodhë vërtetë (shtuar këtu edhe argumentet e vendlindjes, që këtë herë do të ishin të bazuara), por thonë se misioni i tyre është ndërgjegjësimi i njerëzve dhe për të shkundur klasën politike vendase.
