Seksioni për Dekriminalizimin në Prokurorinë e Përgjithshme i ka kërkuar Komisionit Qendror të Zgjedhjeve heqjen e mandatit të deputetit socialist Armando Prenga.
Kërkesa e prokurorisë është siguruar nga Hashtag.al dhe aty detajohet problemi që kanë konstatuar prokurorët me formularin e vetëdeklarimit të Prengës.
Sipas prokurorisë, zoti Prenga ka shmangur nga vetëdeklarimi një vendim të gjykatës së Kurbinit ndaj tij si dhe një vendim të autoriteteve italiane.
Në kërkesën e prokurorisë shkruhet:
Fakti që në formular nuk është pasqyruar asnjë e dhënë e përcjellë në lidhje me vendimin penal të formës së prerë dhenë nga Gjykata e Shkallës së Parë Kurbin apo nga autoritetet italiane të drejtësisë në lidhje me të kaluarën e tij kriminale, e bën këtë subject të përfshihet në kushtet e ndalimit të ushtrimit të funksionit public si deputet i Kuvendit të Shqipërisë. (…) Kjo pasojë sjell përjashtimin e menjëhershëm dhe në çdo kohë nga funksioni publik që mban”.
Përtej veprimeve proceduriale të prokurorisë, kjo histori mund të ketë përfshirë në vorbullën e saj dhe ambasadorin e SHBA-ve në Tiranë.
Disa qëndrime të forta të zotit Donald Lu, ‘çuditërisht’ përkojnë me etapat që ndiqte hetimi i prokurorisë ndaj Armando Prengës.
Dy janë momentet kyçe:
Momenti i parë, kur seksioni për dekriminalizimin në prokurori firmosi procedimin e Prengës në janar dhe e dorëzoi tek kryeprokurori Llalla, ambasada e SHBA-ve thirri me urgjencë shefen e seksionit të dekriminalizimit Rovena Gashi dhe i vendosi asaj mbi pasaportë një vulë që refuzonte çdo mundësi të kësaj prokuroreje për të shkelur SHBA-të.
Momenti i dytë u konsumua në fillim të muajit shkurt, vetëm pak orë pasi dosja e Prengës ishte firmosur dhe nga Adriatik Llalla. Ambasadori Lu doli para mediave dhe akuzoi me një gjuhë të pazakontë kryeprokurorin Llalla se po pengonte reformën në drejtësi, por mes rreshtave ambasadori Lu ngriti dhe një pretendim të papritur.
Ai u shpreh se kryeprokurori Llalla po përpiqej të ndikonte dhe zgjedhjet parlamentare të Qershorit.
Ambasadori nuk ofroi asnjë argument të vetëm se si mundej Llalla t’i ndikonte këto zgjedhje, por ky shqetësim ende i pasqaruar i zotit Lu, përkon plotësisht me vendimin e prokurorisë për të çuar në KQZ dosjen Prenga. / Hashtag.al
