Duke filluar nga muaji mars pensionet pritet të rriten me rreth 3%. Kjo rritje do të bëhet në kuadër të paketës së solidaritetit që ka miratuar qeveria. Ministri i Mirëqënies Sociale dhe Rinisë, Blendi Klosi ka konfirmuar dje në Durrës se nga kjo rritje do të përfitojnë të gjithë pensionistët që janë në skemë.
Këtë ministri Klosi e ka thënë gjatë inagurimit të agjencisë së re të sigurimeve shoqërore në Durrës. Investimi i Ministrisë së Mirëqënies Sociale dhe Rinisë ka sjellë një fytyrë të re të shërbimit ndaj qytetarëve në gjithë qarkun e Durrësit.
Në këto zyra trajtohen 180 mijë ankesa në vit. Tani shërbimi i ri dhe përqëndrimi i dokumentacionit vetëm në një zyrë ka përgjysmuar ankesat e qytetarëve për tërheqjen e pensionit. Zyra e re e Durrësit është një nga shtatë zyrat e reja ku është investuar nga MMSR përgjatë këtij viti.
Ministri Klosi gjatë inagurimit deklaroi se përmirësimi i shërbimit ndaj qytetarëve të moshës së tretë, është pjesë e paketës së solidaritetit dhe vjen paralelisht me rritjen e pensioneve, që do të nisë nga data një mars.
“Ky shërbim vjen për moshën e tretë së bashku me paketën e solidaritetit që ne miratuam në fund vit për t’i dhënë atyre shpërblimin më të madh të dhënë ndonjëherë për moshën e tretë dhe po ashtu në përgatitje të rritjes së pensioneve që nga 1 marsi do të jëtë riindeksimi më i madh i pensioneve që ka ndodhur ndonjëherë për të gjithë skemën e pensionistëve. Shërbimi që do të ofrohet në këtë sistem tashmë është një sistem i integruar i cili po e realizon me shumë shpejtësi premtimin tonë shumë të madh karshi pensionistëve që në vetëm harkun kohor të një viti kemi përgjysmuar gjysmën e ankesave karshi gjithë sistemit tonë të përkujdesjes për moshën e tretë.
Do të vazhdojmë dixhitalizimin e skemës informatizimin dhe lidhjen shumë më të mirë me zyrat e tatimeve me zyrën e hipotekës me të gjithë institucioneve të tjera për të gërshetuar informacionin për t’i shërbyer më shpejtë qytetarëve, një shërbim më të mirë por edhe një pension më të rritur për të gjithë ata që e kanë pasur të vështirë që gjejnë vitet e punës dhe kontributin që kanë dhënë gjatë gjithë këtyre viteve”, tha Klosi.
Një tjetër reformë e madhe për të ulur burokracitë dhe sorrollatjet nëpër zyrat e shtetit, është digitalizimi i të gjithë sistemi të sigurimeve shoqërore. Këto zyra do të jenë të lidhura me të gjitha zyrat e tjera të shtetit, tatime, hipoteka, për të shmangur nevojën e pajisjes me dokumentacion në to, dhe duke u shërbyer vetëm në një sportel.
