Policia e shtetit ka publikuar foto nga gjetja e një pjese tjetër të parave që u grabitën më 9 shkurt në Qafë Kashar. Sipas burimeve nga policia, paratë janë zbuluar pranë banesës së Admir Çerpjas, i arrestuar një ditë më parë në Dibër. Paratë u gjetën në zonën e Bathores të groposura brenda një tenxhereje.
Nuk dihet ende shuma e parave të zbuluara, por ato janë valutë të prerjeve euro dhe paun britanik. Sipas hetuesve paratë janë të BKT të grabitura një javë më parë në aksin Tiranë – Rinas. Policia gjeti një pjesë tjetër të parave, të groposura në disa tenxhere presioni në Vlorë, pranë banesës së Neim Avdulajt dhe një shumë tjetër në servisin e Fatjon Xhyliut, të dy të arrestuar për ngjarjen.
Deri tani në pranga për grabitjen spektakolare të 3.2 milionë dollarëve të bankës, janë vënë 5 persona. Në kërkim është personi që konsiderohet si “koka” e bandës, Admir Murataj.
