Kreu i Partisë Republikane, Fatmir Mediu, u ka bërë apel qytetarëve që t’i bashkohen protestës së opozitës më 18 shkurt në Tiranë. Sipas Mediut, lirinë, jetën dhe të ardhmen “na i ka falur Zoti. S’i lëmë peng të Ramës”.
“18 shkurti është dita juaj. A ia vlen të luftojmë për liritë dhe të drejtat tona? A ia vlen të luftojmë për familjet dhe vendin tonë? Prandaj do të jemi së bashku për të treguar se ia vlen edhe njëherë së bashku me bindje.
Lirinë, jetën dhe të ardhmen na i ka falur Zoti e s’i lëmë peng të këtij pushteti të pazarit dhe antiligjit, korrupsionit dhe varfërisë, krimit dhe shkatërrimit. S’i lëmë peng të Ramës.
Ne duhet të luftojmë kundër banditëve që sillen si shteti dhe shtetit që sillet si bandë. Duhet të luftojmë për ta bërë Shqipërinë të madhe dhe të begatë. Për ta bërë Shqipërinë europiane siç e bëmë vend anëtar të NATO-s”, shkruan Mediu në rrjete sociale.
