Politikani dhe botuesi Koço Kokëdhima shfrytëzoi emisionin e pasdites “Rudina” në TV Klan, që të përcillte mesazhe politike edhe pse po flitej për dashurinë dhe për Shën Valentinin. I veshur casual me xhinse, në shoqërinë e të shoqes, Kokëdhima, tashmë themelues dhe drejtues i Lëvizjes “Zgjidhja” brenda PS-së, i bëri një surprizë të ëmbël bashkëshortes, Brixhida, duke i dhuruar një tufë me karafilë të kuq.
Ai u shpreh se lulet i ka shumë për zemër dhe i dhuron shpesh ato, por shprehu trishtimin se pse këto lule, si shumë gjëra të tjera që tregtohen në vend, vijnë nga jashtë dhe nuk prodhohen këtu, edhe pse këtu ka shumë mundësi për një biznes të tillë. Rudina ndërhyri duke u shprehur se kjo është një ide e mirë për të krijuar biznes.
Çifti Kokëdhima rrëfeu momente të panjohura për jetën në mëse 35 vite martesë, marrëdhënien mes tyre dhe me tre vajzat. Vajza e dytë, Bora, e cila ndjek një master për modë në Firence u bëri një surprizë nga larg, duke i përshëndetur me një video nga Italia. Prej disa muajsh, Kokëdhima po bën takime me socialistët e bazës, duke prezantuar Lëvizjen “Zgjidhja”, e cila synon të reformojë partitë për të reformuar vendin, për ta bërë Shqipërinë një vend të zhvilluar dhe ku shqiptarët të ndërtojnë jetët e tyre, duke mos zgjedhur largimin, siç kanë bërë deri më sot.
