Ndryshe nga çfarë iu njoftua aktivistëve të shoqatave civile se punimet mbi rrënojat antike do të ndërpriten deri më 16 Shkurt, punimet duket se nuk kanë të ndalur, madje edhe me eskavator mbi rrënoja.
Në kuadrin e marrjes së një vendimi, përfaqësues të qeverisë i premtuan shoqatave civile ndërprerjen e gërmimeve.
Aktivistja Brizida Gjikondi shkruan në Facebook:
“Në Durrës, askush nuk ka pezulluar punimet. Përkundrazi GERMOHET me histeri. Jo me pajisje Arkeologu, as me kazëm.. me ESKAVATOR KRIMINAL. Live. Pikërisht tani. Festoni 14 Shkurtin Dele.. se për kaq kemi ardhur mbi këtë tokë të bekuar”.
Siç shihet nga kjo video, në vendngjarje situata është alarmante dhe rreziku i dëmtimit të objekteve arkelogjike është i sigurtë.
“Veliera”, projekt i Bashkisë së Durrësit është në zonën e kategorisë së parë arkeologjike, në afërsi të torrës veneciane. Dje në komisionin parlamentar, iu kërkua shpjegim kryebashkiakut të Durrësit Vangjush Dako dhe ministres së Kulturës, Mirela Kumbaro për këto ndërhyrje. Sipas Dakos aktualisht po punohet në zonën që nuk ka prezencë të objekteve arkeologjike dhe gjithçka po monitorohet me kamera.
