Vdekja tragjike e dy të rinjve në periferi të Fierit, vijon të krijojë dhimbje në komunitetin fierak dhe me gjerë.
Gjithsekush përpiqet të mësojë shkakun e kësaj tragjedie, ndërsa ata që po punojnë për t`i dhënë fund dilemave, hamendësimeve dhe thashethemeve, janë specialistët e grupit hetimor, që po hetojnë intensivisht për gjetjen e shkaqeve, rrethanave,që krijuan ngjarjen e rëndë, me dy viktima. Burime nga grupi hetimor, të pazyrtarizuara, pohojnë se shtetasja 29-vjeçare, që para festës tradicionale të Vitit të Ri, ka kërkuar ndërprerjen e lidhjes me viktimën 32-vjeçare. Këtë fakt e kanë pohuar dëshmitë e dhëna nga të njohur të saj. Ermira punonte prej kohësh në një njësi shitëse prodhim perdesh, në rrugën kryesore të qytetit.
“Ajo kërkonte të kthehej në një jetë të qetë pranë familjes së saj”- kanë pohuar shoqet para grupit hetimor. Por kjo gjë sipas dëshmive të dhëna prej tyre, është refuzuar nga 32-vjeçari. Policia dhe grupi hetimor, pas marrjes së dëshmive dhe depozitimit të tyre në dosjen hetimore, kanë kërkuar hetimin e tabulateve telefonike për gjashtëmujorin e fundit, tabulate që do të nxjerrin në dukje komunikimin me zë dhe me mesazhe, mes palëve. Kërkesa në fjalë është nisur prej prokurorisë drejt kompanisë telefonike mobile, numrat e të cilës mbanin dy viktimat.
I njëjti burim, tha se do të vijojnë hetimet edhe për ndonjë konflikt të djalit apo të vajzës, me të tjerë persona, konflikt që mund të ketë sjellë dhe premisë të lindjes së debateve, grindjeve deri edhe ngjarjen e rëndë.
Ndërkohë, nga grupi hetimor janë sekuestruar kamerat e vendosura në njësinë shitje-perdesh të Ermirës si dhe kamera që krijonin fushëpamje në këtë njësi nga biznese të tjerë.
Fqinjë të familjes së bashkëshortit në Fermë Çlirim Fier kanë deklaruar se kjo familje është shembull në këtë lagje, dhe se ngjarja i ka rënduar shumë shpirtërisht. “Janë familje e mrekullueshme”, ka thënë njëri nga fqinjët e tyre. Ermira Arapi dhe Drini Derveni humbën jetën dy ditë më parë në Fier. Kalimtarë të rastit gjetën trupat e pajetë brenda një automjeti në pronësi të Dervenit. Policia zyrtarisht u shpreh se bëhej fjalë për një vrasje dhe më pas vetëvrasje nga ana e Drini Dervenit. Edhe Ai rridhte nga një familje e respektuar në Fier!
