Burime tepër të besueshme të gazetës “Telegrafi” nga Elbasani shprehen se “mbi 216 socialistë nga 5 organizata në lagjet e qytetit kanë braktisur përfundimisht Partinë Socialiste dhe janë anëtarësuar tek LSI. Kjo gjë ka detyruar kreun e degës lokale të Rilindjes, drejtorin e Punësimit, Ardit Demiri të kërkojë me urgjencë ardhjen e kryeministrit Edi Rama dhe kreut të Grupit Parlamentar socialist Gramoz Ruçi, “pasi situata e krijuar nuk jep shanse të mira për fushatën e afërt”.
“Telegrafi” raporton se dihet publikisht se LSI në Elbasan ka arritur të afrojë dhe anëtarësojë rreth saj me qindra socialistë të mospajtuar me qeverisjen e partisë tyre, qindra të zhgënjyer që ishin dhe janë akoma edhe sot pa punë, pa shtëpi, pa shkollim, dhe të pashpresë për të ardhmen. E ndërsa dega e LSI firmoste anëtarësimet e reja, kryesia lokale e Rilindjes, jepte alarmin se “baza po na largohet drejt Ilir Metës, rrezikojmë të mos marrim as 3 deputetë në 18 qershor”.
Sakaq mësohet se telefonatës i është përgjigjur Ruçi duke premtuar se “do të ndalemi gjatë në Elbasan”.
Parashikimet flasin se më 18 qershor LSI ka gjasa të dalë forcë e parë në Elbasan, ndërkohë që për PD dhe PDIU shanset janë të barabarta. Duket paksa paradoksale, por PS në Elbasan pritet të marrë rezultatin më të dobët në 26 vitet e fundit. Kjo për faktin se edhe në Këshillat Bashkiake, në Këshillin e Qarkut dhe kudo, LSI është kthyer në faktor vendimtar në miratimin apo mosmiratimin e mjaft vendimeve që lidhen me investimet apo problemet e tjera jetike për qytetin dhe komunitetin, raporton “Telegrafi”.
