Ashtu siç pritej, ministri i Brendshëm dhe policia që është shndërruar, nga e Shtetit në “privaten e Tahirit”, edhe pas grabitjes së fundit spektakolare të parave të një banke nuk morën përsipër asnjë përgjegjësi. Sërish gjithçka, po shkarkohet mbi policitë private dhe bankat.
Ajo që nxituan të bënin menjëherë pas ngjarjes së rëndë në Qaf Kashar, një “film” i pritshëm dhe i përsëritur ishte arrestimi i punonjësve në vendngjarje dhe heqja e licencës komanisë private të sigurisë “Jaguar”, që bënte transportin e valutës.
Për të katër ngjarjet e rënda të grabitjes së valutës së bankave të nivelit të dytë në një hark brenda më pak se dy viteve, Policia e Shtetit e ka shmangur me këmbëngulje përgjegjësinë e saj. Ndryshe nga sa bën me ngjarje të tjera të rënda në vend, Tahiri lejon krerë të lartë të uniformave blu, që të dalin nëpër studio televizive dhe të “argumentojnë” që këto grabitje bëhen nga grupe që kanë informacion dhe bashkëpunim të brendshëm me kompanitë private që transportojnë valutën. Kështu ndodhi edhe mbrëmë.
Opinioni u bombardua nga televizionet pranë qeverisë, me kryepolicë që fajin ja hidhnin kompanisë private, jo vetëm për paaftësi dhe mos plotësim të kushteve të sigurisë gjatë operacionit të transferimit të valutë, por duke lënë për të nënkuptuar qartë, që ka bashkëpunim me grabitësit. Faktikisht edhe në opinionin publik mbizotëron perceptimi që këto vjedhje të denja për filma të Hollyvudit, bëhen nga “brenda”.
Në funksion të kësaj policia arrestoi menjëherë pas ngjarjes të gjithë punonjësit në vendngjarje të kompanisë policore private dhe shkoi edhe më tutje, duke i hequr fare licencën “Jaguarit”.
Mos vallë policia sistematikisht ka pasur dyshime dhe informacion, se në të katërt raste paratë e bankave janë vjedhur vetë nga kompanitë?
Nëse është kështu, atëherë përse reagimi që bën ndaj tyre është me dy standarde? Le ti marrim ngjarjet me radhë.
Në muajin Shkurt të vitit 2015-të një grup i armatosur rrëmbeu mjetin e policisë private që do transportonte drejt Thesarit të Shtetit paratë e një banke private duke marrë dy thasë me kartëmonedha, siç u deklarua atëherë rreth 1 miliard lekë të vjetra. Ngjarja ndodhi, para një banke që ndodhet në afërsi të Stacionit të Trenit, te bulevardi “Zogu i Parë”, në Tiranë.
Autorët, të armatosur me kallashnikovë dhe pistoletë kishin zënë pritë në tunelin në mes pallateve ku çdo ditë makinat e blinduara merrnin paratë nga banka. Sipas pamjeve që dolën më pas nga kamerat e sigurisë në këto ambiente sjellja e punonjësve të policisë private “Gjici” përballë grabitësve ishte sa skandaloze, aq edhe e dyshimtë.
Edhe atëherë si për ngjarjen e mbrëmshme, policia (private) e Saimir Tahirit e hoqi përgjegjësinë nga vetja dhe hodhi dyshime, se grabitësit kishin bashkëpunëtorë brenda kompanisë private.
Deri këtu, “në rregull”. Por pyetja që shtrohet është, se përse ka vepruar me dy standarde pas këtyre ngjarjeve? Përse nuk iu hoq licenca edhe Safet Gjicit për vjedhjen kolosale të parave tek Union Bank, edhe pse u vërtetua se (në rastin më të mirë) pati neglizhencë totale nga kompania e tij?
Madje “standardi i partisë” shkoi edhe më tej atëherë; i vëllai i Safet Gjicit që ishte edhe përgjegjës direkt gjatë operacionit të kësaj transferte si komandant i grupit të shoqërimit të parave, nuk u arrestua siç ndodhi mbrëmë me kolegët e tij të “Jaguar”. Heqja e licensës “Gjicit të partisë”, as që i shkoi ndërmend Tahirit. Por ecim më tej…
Në mes të muajit Qershor të vitit 2016, një grup personash të armatosur kryen një super grabitje këtë herë në brendësi të një objekti të rëndësisë së lartë, në pistën e aeroportit të Rinasit, ku arritën fare thjeshtë të marrin rreth 3 milionë euro.
Kjo grabitje që shokoi opinionin publik ndodhi një ditë pas masave të forta të sigurisë në Rinas, si rezultat i sulmeve terroriste në aeroportin e Stambollit. Por kjo nuk e pengoi fare policinë që sërish të mos merrte asnjë përgjegjësi, duke ja hedhur fajin publikisht policisë private që transportonte valutën.
Kjo kompani quhet “Nazeri security”. Mënyra se si kryente transportin dhe reagimi që bënë punonjësit e saj gjatë grabitjes, ishte skandaloze. Më pas u zbulua që kjo kompani kishte shkelur të gjitha rregullat për të kryer këtë operacion dhe nuk plotësonte asnjë lloj parametri, për tu marrë me këtë punë.
Por Tahiri dhe policia e tij nuk ja hoqën licencën, siç bënë me rastin e fundit. Përse? Mos ndoshta ky “tjetër standard” ka funksionuar kështu, sepse pronar i “Nazeri security” është avokat i Partisë Socialiste dhe bashkëshortja e tij, ish-shefe kabinet e Edi Ramës dhe sot nëndrejtoreshë e ANTA?
Çfarë e shtyn Saimir Tahirin që edhe për ngjarje kaq të rëndë të përdor dy standarde; një të partisë dhe një të ligjit?
SYRI.net
