Një shpërthim ka ndodhur rreth orës 10:00 të paraditës së të enjtes në centralin bërthamor të lokalitetit Flamanville të Francës, raporton BBC.
Mediat lokale raportojnë se nga shpërthimi mund të ketë pasur të plagosur, ndërkohë që sipas Prefekturës së qytezës, nuk ka asnjë rrezik kontaminimi bërthamor.
Shpërthimi është verifikuar në sallën e makinerive të centralit atomik, ku nuk ka elementë radio-aktivë. Rrjedhimisht, deklarojnë autoritetet, nuk ka asnjë rrezik bërthamor për punonjësit dhe popullsinë lokale.
BBC raporton se grupet e shpëtimit kanë mbërritur ndërkohë në vendin e ngjarjes dhe njësitë e zjarrfikësve kanë nisur një operacion në mbarë zonën.
Edhe zjarrfikësit kanë konfirmuar fillimisht një shpërthim dhe më pas një zjarr që ka rënë në brendësi të centralit, por jashtë zonës nukleare.
