Një shpërthim me eksploziv ka tronditur kryeqytetin mëngjesin e sotëm. Ngjarja ka ndodhur në një palestër në afërsi të Kopshtit Botanik në Tiranë.
Burime nga policia bëjnë me dije se tritoli ishte vendosur në murin e jashtëm të palestrës.
Fatmirësisht nuk ka asnjë person të lënduar nga shpërthimi me eksploziv por vetëm dëme materiale.
Shpërthimi ka ndodhur rreth orës 05:30 dhe ka shkaktuar panik tek banorët e zonës. Në vendin e ngjarjes kanë mbërritur forcat e policisë të cilët kanë nisur hetimet për zbardhjen e shkaqeve të shpërthimit.
Paraprakisht dyshohet se ngjarja mund të ketë ndodhur për motive të konkurrencës. Megjithatë, grupi hetimor është duke marrë në pyetje pronarët e biznesit.
