Edhe kreu i Kuvendit, Ilir Meta ka dhënë një mesazh për ndarjen nga jeta e shkrimtarit Dritëro Agolli me anë të një konferencë për shtyp në ambientet e kryesisë së Kuvendit.
“Pas këtij lajmi sot, bota shqiptare është më e varfër dhe dhimbje pa dyshim e jashtëzakonshme dhe e pamatshme. Si kryetar i kuvendit dhe si mik i tij shpreh ngushëllimet e mia më të sinqerta familjes së Dritëroit, Sadijes, Elonës dhe Tanit,” tha Meta.
Kreu i Kuvendit u shpreh se Dritëro Agolli ishte dhe do të mbetet një figurë e rendit të parë, reformator i letërsisë shqipe dhe politikës shqiptare.
“Dritëro Agolli ishte dhe do mbetet figurë e rendit të parë në zhvillimin e letërsisë…reformator historik i letërsisë shqipe. Reformator i jashtëzakonshëm edhe i politikës shqiptare me një kontribut historik për proceset demokratizuese. Burrë shqiptar me rrënjë të thella dhe karakter të fortë. Referencë e zhvillimit tonë shpirtëror. Njeriu i kohëve moderne që jetoi me filozofinë naimiane për t’u ndritur mendjen të tjerëve,” u shpreh Meta.
