Rastet e dhunës në shkollat shqiptare janë kthyer në një shqetësim të madh. Fenomeni i njohur si bulizmi është për fat të keq në rritje të vazhdueshme.
Ai përfshin sjelljet e përsëritura, të dëmshme e agresive ndërmjet personave që ndryshojnë në nivelin e tyre të forcës dhe mund të jenë si fizike, ashtu edhe psikologjike. Ato përfshijnë goditjet, rrahjet, ngacmimet verbale, gjestet fyese, përjashtimin ose thjesht presionin për t’iu përshtatur dëshirave të atyre që krijojnë sjelljen buliste.
Në rastin konkret një video amatore e cila mendohet se është xhiruar në tualetin e një shkolle 9-vjeçare në Fier, para rreth një muaji, tregon një rast flagrant të bulizmit.
Nga pamjet duken një grup djemsh të cilët detyrojnë një djalë më të vogël që të futet në tualet dhe aty më pas fillojnë ta ngacmojnë seksualisht dhe psikologjikisht. Një ngjarje e rëndë kjo e cila duhet identifikuar sa më parë nga autoritetet e arsimit, në mënyrë që ky djalë të mos dhunohet më verbalisht dhe psikologjikisht.
