Një çift homoseksualësh, banues në provincën e Pavias në Itali, kanë blerë për 70 mijë euro një foshnjë të sapolindur shqiptare, raporton media e vendit fqinj.
Policia italiane ka denoncuar çiftin homoseksual, i përbërë nga një avokat italian dhe i dashuri i tij shqiptar, me akuzën se kanë paguar prindërit biologjikë të foshnjës duke u shtirur se avokati është babi i të sapolindurit.
Sakaq gjithashtu u denoncuar edhe nëna biologjike e fëmijës. Sipas hetimeve ajo ka mbërritur në shtetin italian në gjënden e një shtatëzanie të avancuar dhe e shoqëruar nga i dashuri i saj që është dhe babai i vërtetë i foshnjës.
Por menjëherë pas mbërritjes në Itali, avokati homoseksual është martuar me nënën shqiptare me qëllimin e vetëm për të marrë atësinë e foshnjës.
Më pas u zbulua se i dashuri i saj dhe babai i vërtetë i foshnjës është vëllai i homoseksualit shqiptar që bashkëjeton prej vitesh me avokatin italian.
Pakti i marrëveshjes mes dy çifteve ishte lindja e fëmijës në shtetin italian e heqja dorë nga atësia biologjike kundrejt pagesës së një shume prej 70 mijë euro. Menjëherë pas lindjes së fëmijës, çifti shqiptar është rikthyer në Shqipëri.
Denoncimi i kësaj ngajrje ka ardhur pas një rrëfimi konfidencial në polici të një personi të tretë.
Sakaq pas marrjes në pyetje nga policia italiane, nëna shqiptare ka rrëfyer tërë historinë duke pranuar se ka marrë nga çifi homoseksual vetëm 5 mijë euro nga 70 mijë euro të premtuara.
Analiza e ADN së fëmijës ka vërtetuar atësinë e vërtetë. Aktualisht nëna e foshnja ndodhen në një strukturë mbrojtjeje në Itali.
