Ralf Gjoni, këshilltari i kryetarit të Kuvendit, Ilir Meta ka dalë hapur në mbështetje të Ministrit të Drejtësisë (ende në detyrë), Ylli Manjani. Në një postim në profilin e tij në facebook, Gjoni shprehet se qëndrimi i Manjanit duhet të ishte edhe i LSI-së.
“Mirënjohje Ylli Manjanit për punën, përkushtimin profesional dhe guximin që ka treguar që në fillim në ushtrimin e detyrës së vështirë të Ministrit të Drejtësisë në këtë vend kaq të mpleksur… Nuk është e lehtë të pranosh këtë pozicion në Shqipëri, më besoni miq.
Emerimi i Manjanit ishte i nevojshëm. Duhej një impuls i ri për reformën në drejtësi. Shkarkimi i tij i panevojshëm! Edhe pak muaj na ndajnë nga zgjedhjet… E vlerësoj guximin e tij për t’i rezistuar presionit të dorëheqjes dhe çmoj maksimalisht kurajën e tij të vazhdueshme për të ngritur zërin përballë çdo padrejtësie brenda qeverisjes, kundër praktikave keq qeverisëse apo kundër çdo dashakeqësie të qëllimshme që prishte frymën e një koalicioni që duhet të ishte konstruktiv në të gjitha etapat e ekzistencës së tij.
Për mua Manjani ka simbolizuar atë që LSI duhet dhe i takon të jetë brenda një koalicioni: sinqeritet, guxim dhe drejtësi! “A fair deal!” Por, fatkeqësisht jo të gjithë e shohin me të njëjtin sy përgjegjësinë që kanë…” u shpreh Ralf Gjoni në “facebook”.
