“Shpërthimi i tij në konferencë tregoi pse nuk mund të ishte më në qeveri”. Ky ishte reagimi i parë nga rradhët e qeverisë pas shkarkimit të ministrit të Drejtësisë, Ylli Manjani dhe konferencës për shtyp që mbajti ky i fundit.
Deklarata u bë nga numri dy i qeverisë Niko Peleshi, fill pasi përfundoi një mbledhje në selinë e PS¬së me 12 koordinatorët politik në qarqe, ku as Rama dhe as Tahiri nuk kanë dashur të komentojnë deklaratat e Manjanit.
Por, pak minuta para zyrtarizimit të largimit të Manjanit ishte vetë zv. kryeministri Peleshi që mohoi zërat për ndryshime në qeveri. “Nuk ka asnjë shkarkim. Ku e keni dëgjuar këtë? Nuk mund të komentoj asgjë në ajër”, tha zv/kryeministri Niko Peleshi për mikrofonin e Top Channel.
