Pak minuta pasi kryeministri Edi Rama la zyrën e kryeparlamentarit Meta, pas një takimi afro 45 minutësh “kokë me kokë” mes tyre, në Kryesinë e Kuvendit është shfaqur ministri i Drejtësisë, Ylli Manjani, i cili takoi Metën.
Gjatë gjithë paradites së sotme Meta ka mbajtur takime me ministrat e LSI, por takimi me Manjanin merr vëmendje të veçantë, pas lajmeve ku përflitej se ai po shkarkohej nga detyra.
Fundjava u shoqërua me informacione kontradiktore, që herë ministri i Drejtësisë Ylli Manjani ishte shkarkuar, e më pas ky shkarkim “u gris” nga Rama.
Më pas u dha lajmi se Manjani kishte dhënë dorëheqjen. Por vetë ministri pak pas mesnate ka shkruar në profilin e tij në Facebook se ishte në detyrë dhe nuk kishte ndërmend që të jepte dorëheqjen. Duke thënë se nuk do të shkarkohej.
Por mesa duket mëngjesi i sotëm e ka gjetur Ylli Manjanin në zyrën e tij të ministrit të Drejtësisë.
