Nuk janë vetëm myslimanët prej 7 vendeve në “listën e zezë”, të prekurit e parë nga urdhri ekzekutiv i Trump. BBC raporton se një veterinere nga Glasgow përjetoi zemërimin dhe frikën, kur iu ndalua fluturimi tranzit në Shtetet e Bashkuara. Hamaseh Tayari, poseduese e një pasaporte iraniane, duhet të kthehej në Britani nga Nju Jorku pas pushimeve të kaluara në Kosta Rika.
Masat e presidentit amerikan synojnë të mbajnë jashtë territorit amerikan terroristët radikalë islamikë.
Kryeministrja britanike Theresa May u zotua të ndërhyjë, nëse vendimi i Trumpit për refugjatët do të prekë shtetasit britanikë. “Downing Street” nxori një deklaratë ku sqarohej pozicioni i shefes së qeverisë.
BBC shkruan se përpara se të shtrëngonte duart me kreun e ri të Shtëpisë së Bardhë e të buzëqeshnin të dy përpara kamerave, May i premtoi botës se nuk do të druhej t’ia shprehte hapur Trumpit mendimin e saj, kur nuk ndante të njëjtin mendim me të.
Pengesa e parë, megjithatë, nuk vonoi të mbërrinte dhe ky është një telash për kryeministren britanike. “Trumpi është e qartë se do të shkelë dhe shumë vija të tjera, e nëse ajo nuk reagon, do të shihet si partnerja e dobët që i bindet një udhëheqësi më të fuqishëm”, shkruan BBC.
