Mbyllen dy gazeta historike në Greqi! “To Vima” dhe “Ta Nea” të grupit mediatik “DOL” janë detyruar të publikojnë sot numrin e tyre të fundit.
Aksioneri kryesor i tyre, Stavros Psiharis, përmes një artikulli me titull “Kush po e mbyt shtypin”, përshkruan sesi bankat kreditore të grupit mediatik kanë vendosur të ngrijnë dhe të përvetësojnë çdo të ardhur, si nga shitja, ashtu edhe nga reklamat, për të plotësuar pjesën e pashlyer të kredive të dhëna prej rreth 300 mln eurosh, që nuk ishin shlyer për një kohë të gjatë.
Mediat greke raportojnë se bashkë me dy gazetat, ndalojnë punën edhe portali “in.gr”, stacioni radiofonik “Vima 95.5”, si dhe disa revista.
Sakaq në artikull kritikohen si qeveria, ashtu edhe opozita për indiferencën ndaj mbylljes së vazhdueshme të medieve në mbarë vendin.
Nëse nuk gjendet një zgjidhje e shpejtë financiare, rreth 500 gazetarë dhe personel teknik humbasin vendet e punës, kompensimet dhe pagat e 6 muajve të fundit të papaguara, ndërsa grupi mediatik në ditët në vijim bëhet pjesë e një regjimi të veçantë të menaxhimit, nga ana e bankave kredituese.
Mbyllja e dy gazetave tregon edhe njëherë se sektori i shtypit është ai që ka pësuar goditjen më të rëndë nga kriza ekonomike në Greqi, pasi prej vitit 2008 të ardhurat e gazetave dhe kanaleve televizive u reduktuan në masën 70%.
Vetëm gjatë viteve të krizës janë mbyllur mbi 50 gazeta të tjera lokale, pasi shitjet ranë me më shumë se 40%. Po ashtu u mbyllën edhe dy kanale të mëdha televizive, si “Alter” dhe “Mega”.
Papunësia në radhët e gazetarëve ka shkuar tashmë në 60%, raportojnë mediat në Greqi.
