Një ish-punonjës policie është arrestuar, ndërsa një specialist i Drejtorisë së Rrugëve është shpallur në kërkim gjatë një operacioni të Antidrogës së Tiranës, që sekuestroi 1 kg kokainë. Ish-polici Gjergji Gjinaj Në pranga përfundoi edhe një person i dënuar më parë për falsifikim dokumentesh, tek i cili sigurohej lënda narkotike, që më pas shitej me pakicë në zona të ndryshme të kryeqytetit.
Të arrestuarit janë Gjergji Gjinaj, 49 vjeç, ishpunonjës i Policisë së Kurbinit, i dënuar më parë për trafik droge, dhe Ismail Allushi, 53 vjeç, i dënuar më parë për falsifikim. Policia tha se personi që arriti t’u shpëtonte prangave dhe u shpall në kërkim është 41 vjeçari Arnold Kurti, specialist në Drejtorinë Rajonale të Transportit Rrugor të Tiranës.
Në përfundim të operacionit u sekuestrua në cilësinë e provës materiale rreth 1 kg kokainë, 0.6 gramë heroinë, 1 pushkë sportive me dylbi, dy automjete dhe 2 celularë.
Në banesën e ishpolicit Gjinaj, Policia gjeti e sekuestroi edhe 6750 euro, para që dyshohet se janë përfituar nga veprimtaria e shitjes së drogës. Policia e Tiranës tha dje zyrtarisht se shtetasit e arrestuar dhe i kërkuari dyshohen se në bashkëpunim me njëritjetrin kryenin aktivitetin kriminal të shitjes së lëndëve narkotike, të llojit kokainë e heroinë, në zona të ndryshme të kryeqytetit. Drogën e siguronin te shtetasi Ismail Allushi.
OPERACIONI
Operacioni i koduar “Janari” u zhvillua mbrëmjen e së mërkurës, rreth orës 21:00. Forcat e Antidrogës në bashkëpunim me efektivët e Forcës së Posaçme Operacionale, konstatuan automjetin tip “Fiat 500”, me drejtues shtetasin Gjergji Gjinaj.
Ndërsa rreth 10 metra më larg është konstatuar i parkuar automjeti tip “Audi”, me drejtues shtetasin Arnold Kurti, i cili kontrollonte lëvizjet e personave dhe automjeteve në këtë rrugë. Menjëherë është bërë ndërhyrja nga ana e shërbimeve të Policisë dhe kapja e shtetasit Gjergji Gjinaj. Por në momentin e ndërhyrjes ka arritur të largohet me shpejtësi me automjetin e tij shtetasi Arnold Kurti, duke mos iu bindur thirrjeve për të ndaluar.
Nga kontrolli i ushtruar në automjetin tip “Fiat” është konstatuar një sasi me lëndë të dyshuar narkotike e llojit kokainë, e cila rezultoi me peshë 978 gramë.
Nga informacionet e marra dhe nga kushtet e flagrancës, është ushtruar kontroll në banesën e shtetasit Ismail Allushi, ku është konstatuar një dozë e dyshuar lëndë narkotike e llojit heroinë. Ndërsa gjatë kontrollit të banesës së shtetasit Gjergji Gjinaj, është gjetur një sasi prej 12.5 gramë kokainë, një peshore elektronike, si dhe shuma monetare prej 6750 eurosh. Policia tha dje se po punohet për kapjen e shtetasit Arnold Kurti, i cili arriti të largohej.
Panorama.al
