Policia e Tiranës ka arrestuar dy persona si dhe ka shpallur në kërkim një të tretë pasi akuzohen për trafik të lëndëve narkotike.
Burime nga policia thanë se janë arrestuar Gjergji Gjini, 49 vjeç, banues në Tiranë, i dënuar më parë për “prodhim dhe shitje të lëndëve narkotike”, Ismail Allushi, 53 vjeç, banues në Tiranë, i dënuar më parë për “Fallsifikim të dokumentave”.
Gjithashtu është shpallur në kërkim shtetasi: A. K., 41 vjeç, banues në Tiranë.
Këta persona dyshohen se në bashkëpunim me njëri tjetrin kryenin aktivitetin kriminal të shitjes së lëndëve narkotike, te llojit Kokainë dhe Heroinë, në zona të ndryshme të Tiranës.
Lëndën narkotike e siguronin tek shtetasi I. A. Por ajo që bie në sy ishte fakti se këta persona, këtë aktivitet e ushtronin në derë të Komisariatit numër 1 në Tiranë. Në këtë vend ata bënin shkëmbimin e lëndës narkotike me paratë.
Arrestimi i këtyre personave është bërë mbrëmjen e djeshme rreth orës 21:00, në Rrugën “Vllaznit Huta” vetëm pak metra larg Komisariatit numër 1, ku është konstatuar automjeti tip “Fiat 500”, me drejtues mjeti Gjegji Gjinin, ndërsa rreth 10 metra më larg është konstatuar i parkuar automjeti tip Audi, me drejtues shtetasin A. K., i cili kontrollonte lëvizjet e personave dhe automjeteve në këtë rrugë.
Menjëherë është bërë ndërhyrja nga ana e shërbimeve dhe kapja e Gjinit, por në momentin e ndërhyrjes ka arritur të largohet me shpejtësi me automjetin e tij personi tjetër A. K., duke mos ju bindur thirrjeve për të ndaluar.
Nga kontrolli i ushtruar në automjetin tip “Fiat” është konstatuar një sasi me lëndë të dyshuar narkotike të llojit “Kokaine”, e cila rezultoi me peshë 978 gramë.
Nga informacionet e marra dhe nga kushtet e flagrancës, është ushtruar kontroll në banesën e Ismail Allushit, ku nga kontrolli i ushtruar është konstatuar një dozë e dyshuar lëndë narkotike e llojit “Heroinë”.
Gjithashtu nga kontrolli i banesës së shtetasit Gj. Gj., është gjetur një sasi prej 12.5 gramë lëndë e dyshuar narkotike e llojit “Kokainë”, një peshore elektronike si dhe shuma monetare prej 6750 euro.
Në cilësinë e provës materiale janë sekuestruar:
990 gramë lëndë e dyshuar narkotike e llojit Kokainë.
0,6 gramë lëndë e dyshuar narkotike e llojit Heroinë.
1 pushkë sportive.
12 aparate celularë të markave të ndryshme.
2 automjete të markave të ndryshme.
Materialet procedurale i kaluan Prokurorisë Pranë Gjykatës së Shkallës së Parë Tiranë, për veprën penale “Prodhim dhe shitje të lëndëve narkotike, kryer në bashkëpunim”.
