Që prej se ishte nominuar nga Partia Republikane kandidat për President të SHBA’ve, në Kosovë por edhe në Shqipëri, ka mbretëruar një shqetësim për qasjen që Donald Trump do ta ketë ndaj Kosovës dhe shqiptarëve në përgjithësi, nëse do të zgjidhej President. Vlora Çitaku, ambasadorja e Kosovës në SHBA e ka takuar shefin e ri të shtetit amerikan gjatë një darke në Washington duke i thënë se Kosova është vendi më proamerikan në botë. Por, tani mbetet të shihet se cila do të jetë qasja e administarës së re ndaj Kosovës.
Vetëm pak ditë para ceremonisë së inaugurimit, Donald Trump ka pasur rastin të dëgjojë pak për Kosovën nga Vlora Citaku, Ambasadorja e Kosovës në Shtetet e Bashkuara të Amerikës.
Çitaku ka pasur rastin ta takojë Presidentin e zgjedhur amerikan në një darkë speciale që Komiteti Inuagurues ka organizuar për komunitetin diplomatik në Washington. Përveç Trump ajo ka thënë se ka folur edhe njerëzit kyç të Trump, të përzgjedhur për të shërbyer në administratën e tij.
“Çfarë mbrëmje e mrekullueshme në darkën speciale që Komiteti Inaugurues organizoi për komunitetin diplomatik.Pata rastin të flas shtruar me presidentin e zgjedhur, Trump, me të nominuarin për Sekretar Shteti, Rex Tillerson dhe këshilltarin për Siguri, Michael Flynn. U thash se jam një ambasadore krenare e vendit më pro-amerikan në botë”. Autoritetet kosovare kanë thënë se Kosova ka vendosur kontakte me administratën e re duke thënë qasja e Washingtonit ndaj Kosovës nuk do të ndryshojë. Menjëherë pas Vitit të Ri, Presidenti Hashim Thaci ka qëndriar në SHBA, por atje kryesisht ka takuar zyrtarë të administratës në largim. Nga Partia Republikane ai atje ka takuar vetëm zyrtarë të Senatit.
Gjatë fushatës zgjedhore në SHBA, Thaci kishte thënë se “është shumë i kënaqur që shqiptarët në Shtetet e Bashkuara të Amerikës e mbështesin kandidaturën e Hillary Clinton.” Tani mbetet të shihet se cila do të jetë qasja e administratës së re ndaj Kosovës.
