Ka nisur rreth orës 14:00 mbledhja e grupit parlamentar të PD, ku kreu i opozitës informoi demokratët mbi takimin e disa orëve më parë që pati me aletatët ku u firmos memorandumi për zgjedhje të lira.
Në fjalën e tij deputeti Genc Ruli u shpreh se “ja vlen të shtyhen zgjedhjet, për të patur proces normal”.
Deputeti Bumçi: “Duhet të përgatisim variantin tonë. Nëse e nisim, ta përfundojmë. Duhet të kemi kujdes në vendimmarrje”.
Por deputetja Majlinda Bregu ka kundërshtuar mundësinë e bojkotit të Kuvendit nga ana e opozitës. “Jo 22 parti, por 52 të jenë aleatët tanë, barra është e jona. Unë nuk jam për të dalë nga parlamenti” ka thënë Bregu. Duke shtuar “A jemi të sigurt se jemi gati për protesta?”.
Sipas opozitës votimi dhe numërimi elektronik në zgjedhjet e ardhshme parlamentare është kërkesë e patejkalueshme.
Memorandumi është firmosur edhe nga kreu i PBDNJ, Vangjel Dule, i cili ishte pjesëmarrës në mbledhje.
Sakaq pritet që PD të vendosë marrëdhënie të kushtëzuara me Kuvendin. Në kohën kur ajo kërkon që shumica të pranojë votimin dhe numërimin elektronik, por mazhoranca e refuzon me pretendimin se për këtë kërkohet mendimi i OSBE-ODHIR.
Më herët PD ka deklaruar se pa votim elektronik që garanton zgjedhje të lira dhe të ndershme nuk mund të ketë zgjedhje në qershor.
