Qindra serbë protestuan sot në Mitrovicën veriore për trenin e nisur nga Beogradi që u ndalua të hynte në Kosovë.
Atyre iu drejtua edhe zv/kryeministri dhe ministrat serbë të qeverisë së Prishtinës. Presidenti Nikoliç akuzon administratën e Obamës dhe thotë se shqiptarët duan luftë.
Ndërkohë që Presidenti i Kosovës Hashim Thaçi në reagimin e tij shprehet se qëllimet e Serbisë sot janë të njëjta me ato të Milosheviçit
Presidenti i Kosovës, Hashim Thaçi, tha se Serbia me veprimet e fundit ka treguar se ka qëllime të njëjta me ato të regjimit të Sllobodan Millosheviç gjatë viteve ‘90.
Duke reaguar ndaj komenteve të presidentit serb Tomislav Nikoliç se është i gatshëm të dërgojë ushtrinë në Kosovë, Thaçi deklaroi se Kosova është e interesuar për dialog dhe normalizim të marrëdhënieve, ndërsa i cilësoi të papranueshme kërcënimet për luftë.
Përmes një postimi në “Facebook”, presidenti Thaçi u shpreh i kënaqur për shmangien e tensionimit të situatës politike dhe të sigurisë në vend e rajon, duke ndaluar hyrjen ilegale të trenit propagandistik të Serbisë në territorin e Kosovës.
Thaçi shkruan se Kosova respekton lirinë e lëvizjes së njerëzve dhe mallrave dhe këtë e ka treguar me hapjen e vendkalime kufitare të reja me fqinjët, por s’mund të tolerojë skenarin e vjetër serb, sipas të cilët fatkeqësisht, Beogradi ka ndërmarrë një fushatë provokimesh të vazhdueshme.
“Prandaj, organet e rendit dhe sigurisë morën masa që të pengohet cënimi i integritetit dhe sovranitet të Republikës së Kosovës nga autoritetet e Serbisë-vijon postimi i Thaçit, i cili shpreson që autoritetet e Serbisë të kenë kuptuar se veprimi i tyre ishte i jashtëligjshëm dhe në kundërshtim me frymën e dialogut dhe bashkëpunimit që po promovohet në rajon. /tch/
