Ministri i Drejtësisë Ylli Manjani është pyetur në Top Story në lidhje me rregulloren e vendosur që në ditët e para të qeverisë Rama, ku ministrat e PS duhet të marrin leje nga Këshilltari i Kryeministrit për Mediat, Endri Fuga, në lidhje me çdo deklaratë dhe veprimtari që bëjnë.
Për Ministrin Manjani, kjo është diçka e pakonceptueshme, ndërsa shtoi se ai vetë nuk merr leje nga askush në deklaratat e tij.
I pyetur në lidhje me deklaratat e kryeministrit Rama ndaj Trump, Ministri nënvizoi se ato ishin të nxituara dhe të gabuara.
Pjesë nga Intervista:
Sokol Balla: Kështu si e thoni ju gjendja është kaq sterrë dikush thotë po ju çfarë po bëni në Qeveri?
Ylli Manjani: Gjendja është reale. Kjo Qeveri është më e mirë se Qeveria që shkoi. Ka tregues të matshëm sasiorë dhe statistikorë shumë më të mirë se Qeveria e shkuar. Reforma themelore financiare e shtetit për uljen e borxhit ishte e domosdoshme. Mos presim bum sepse jemi në një moment të vështirë ekonomike rajonal dhe botëror dhe sot problemi i madh botëror është populizmi.
Sokol Balla: E ka këtë sindromë kryeministri Rama?
Ylli Manjani: Ne e kemi diskutuar këtë dhe unë nuk mund të konceptoj që ministri duhet t’i marrë leje Endri Fugës për të dhënë një intervistë.
Sokol Balla: Pra ju sonte keni ardhur pa lejen e Endri Fugës?
Ylli Manjani: Unë nuk i marr leje askujt, ashtu siç nuk marrin leje ministrat e tjerë apo kryeministri.
Sokol Balla: Kryeministri duhej të merrte leje kur foli për Trump?
Ylli Manjani: Po të më kishte pyetur do t’i këshilloja që mos e bënte këtë deklaratë
