Rritet bilanci i viktimave nga i ftohti në vend. Ndërsa dje kryeministri Edi Rama foli për një bilanc pozitiv në mbledhjen e Zyrës Operacionale të Emergjencave, numri i personave që humbin jetën nga i ftohti sa vjen e rritet.
Megjithëse Shqipëria është një vend i vogël, numri i të vdekurve krahasohet me ato vende në Europë që kanë një popullsi ndoshta dhe 10 herë më të madhe se vendi ynë.
Pas 2 endacakëve në Durrës e Sarandë, 1 roje në Golem të Lushnjës dhe një të pastrehur në Korçë, një tjetër viktimë është gjetur në Pogradec. Viktima i identifikuar si Anasras Shuke është gjetur i pajetë nga qytetarët dhe paraprakisht dyshimi kryesor është se ka ndërruar jetë nga i ftohti. Policia ndodhet në vendin e ngjarjes dhe po heton për zbardhjen e rrethanave.
