Pas kapjes së një sasie heroine në tragetin e linjës Durrës-Bari, SHÇBA ka arrestuar një polic kufitar me akuzën e “shpërdorimit të detyrës”.
Sipas një njoftimi Shërbimi për Çështjet e Brendshme dhe Ankesat (SHÇBA), në Durrës thotë se arrestoi në flagrancë punonjësin e Policisë Agim Shaba, me detyrë ndihmës kontrollor në PKK Durrës, për “Shpërdorim të detyrës”.
“Një ditë më parë rreth orës 19:30, duke shkelur urdhrin e eprorit efektivi i Policisë kufitare ka lejuar kalimin në dalje nga Republika e Shqipërisë drejt Italisë, të shtetasit Bashkim Hasani, megjithëse kishte informacione se ky i fundit do të kalonte materiale të kundraligjshme, në bashkëpunim me shtetasen Laureta Lama.
Pas kontrolleve në dhomën e tragetit ku ishin akomoduar për udhëtim dy shtetasit e sipërpërmendur, agjentët e Antidrogës sekuestruan lëndën narkotike, për të cilën kishin informacion.
Arrestimi i Inspektorit Agim Shaba u krye për veprën penale të “Shpërdorimit të detyrës” parashikuar nga neni 248 i Kodit Penal.
Materialet hetimore iu kaluan Prokurorisë për veprime të mëtejshme”,thuhet në njoftim.
